Íslendingar eru frístundamótmælendur

Um helgina var mótmælt og í kvöld er boðað til mótmælafundar. Stöðugt fjölgar í hópi mótmælenda og er að myndast ákveðin stemming í kringum þetta. Mótmælin eru þó ekkert sérstaklega innihaldsrík eða beitt, þetta eru einskonar frístundamótmæli. Fólk hlakkar til helgarinnar og mótmælanna því þá hefur það eitthvað fyrir stafni með börnunum. Þegar mótmælunum líkur er gott að kíkja í kakó eða fá sér einn kaldann. Fyrir knæpueigendur eru laugardagsmótmæli orðin einhverskonar míní menningar nótt með tilheyrandi bjórsölustemmingu.

Ef mótmælendur ætla að ná fram alvöru breytingum þarf að setja meira trukk í mótmælin t.d. með því að fara í mótmælastöður eins og gert var í byltingunni í Úkraníu um árið. Þá voru menn á torgum þar til stjórnin fór frá en kíktu ekki bara við í tvo tíma til að tékka á stemmaranum. Á Íslandi aftur á móti fara mótmælendur í laugardagsmótmæli og síðan í bakaríið. Ef það er kalt þá koma færri og ef eitthvað gott er í sjónvarpinu þá koma ennþá færri. Íslendingar eru í raun ekkert annað en frístundamótmælendur. Ennþá.

Stólar merktir ráðherrum

Tvíeggjað sverð

Tillaga og samþykkt um vantraust er eitt öflugasta verkfæri sem þing hafa til þess að hafa hemil á valdi ríkisstjórna. Það verkfæri ber því að nota sparlega og helst ekki nema þegar raunverulegur möguleiki er á því að einhverjir stjórnarþingmenn hlaupist undan merkjum og taki undir vantraustið svo stjórnin falli. Þrátt fyrir hefðbundið blaður þingmanna og ráðherra Samfylkingar er ekkert sem bendir til þess að þessir aðilar hafi áhuga á því að aflífa Ingibjörgu Sólrúnu foringja sinn eða aðra ráðherra á þessum tímapunkti. Í því ljósi er galið að þingið taki til umfjöllunar og greiði atkvæði um tillögu um vantraust á ríkisstjórn sem hefur aukin meirihluta á þingi. Þetta vopn mun þannig snúast í höndum stjórnarandstöðunnar og verður að sjálfsögðu túlkað sem traustsyfirlýsing frá þinginu þegar tillögunni verður hafnað með miklum meirihluta. Það eru ekki amaleg skilaboð fyrir ríkisstjórn sem vill sitja áfram að hún hafi traust mikins meirihluta þings sem hlaut umboð sitt frá kjósendum fyrir 17 mánuðum síðan. Síðast var borin upp vantrausttillaga á Alþingi á ríkisstjórn Davíðs Oddsonar og Jóns Baldvins sem sat 1991 til 1995. Er það tilviljun að kratar mega ekki setjast í stjórn án þess að á þingi sé borin fram tillaga um vantraust?

Vantrauststillaga komin fram

Hárrétt en sitjandi stjórnvöld þurfa einnig að taka sér tak

Vissulega er rétt að það er ekki á þann glundroða sem ríkir hér á landi bætandi með því að ganga til kosninga nú. Um hvað ætti að kjósa? Hvaða fólk ætti að kjósa, inn og út? Óvissan er nóg í efnahags- og stjórnmálalífi þjóðarinnar og rykið verður að setjast á rústirnar áður en kosningar eða lýðræðislegt uppgjör fer fram. Umræða um kosningar nú sprettur hins vegar ekki af engu. Sitjandi stjórnvöld hafa einfaldlega ekki staðið sig nógu vel. Miklar efasemdir eru varðandi afdrifaríkar ákvarðanir sem teknar hafa verið í þessu hruni Íslands, upplýsingum hefur ekki verið komið skipulega á framfæri til almennings, stjórnendur nýju bankanna virðast djúpt sokknir í spillingu gömlu bankanna og halda áfram að hjálpa sínum gömlu skjólstæðingum í nýju bönkunum undir væng ríkisins, orðrómur er um afskriftir skulda viðskiptamanna, almenningar hins vegar horfir fram á eftir að hafa glatað sparifé sínu, ellilífeyri og atvinnu að glata einnig húsnæði sínu. Augljóslega þarf skýr skilaboð og aðgerðir þurfa nú sem aldrei áður að vera yfir vafa hafnar. Einungis með því að standa sig mun betur geta formenn stjórnarflokkanna sýnt fram á að kosningar komi ekki til greina. 

Með svona vini

Aðstoðarframkvæmdastjóri Evrópuskrifstofu IMF segir léttur í bragði að í janfvægisgengi sé evran á 176 krónur. Það þýðir hvorki meira né minna en að allir sem tekið hafa lán í erlendri mynt eru í raun búnir að vera. Skuldsetning slíkra aðila er þá komin langt yfir 100%, þó fólk hafi verið varfærið í lántökunni. Hvaða rugl er þetta? Er þetta masterplanið hjá IMF, að lána og tala svo krónuna niður úr öllu valdi til þess að tryggja það að fjárfestar hlaupi út með krónurnar sínar? Ef einhverjir höfðu trú á því að mögulega tækju einhverjir stöðu með krónunni eftir flot hennar þá fór þessi náungi endanlega með það í dag. Er ekki best að hætta við þetta lán frá IMF og leyfa manninum að innleiða sína kreppuspeki annarsstaðar?

Vextir IMF rúm 4%

Þá var ennþá hægt að gleyma sér í gælu(dýra)verkefnum

Þetta mál var eitt hið furðulegasta sem komið hefur upp lengi á Íslandi varðandi umgengni við dýr og náttúru og skilgreiningu fólks á stað manneskjunnar í dýraríkinu. Það þurfti alveg sérstakan hefaldreikomiðútínáttúrunaogbaraséðdýrísjónvarpistórborgarbúahugsunarhátt til að geta bullað eins og umhverfisráðherra gerði í þessu máli. Að vera tilbúin til að hætta á að missa ísbjörn inn í þoku uppi á heiði, þar sem jafnvel var fólk á ferli, sýnir ótrúlegan sakleysishátt og skilningsleysi á umhverfi manna og dýra. Þorri þjóðarinnar átti bágt með að trúa að slíkur hugsunarháttur væri yfir höfuð til staðar á Íslandi. Hvað þá í æðsta embætti umhverfismála! En reyndar vissi þjóðin að um íslenskan stjórnmálamann var að ræða þegar eðlilegt þótti að leigja flugvél fyrir sig og nokkra fylgdarmenn á kostnað skattborgara til að geta flækst fyrir vinnandi mönnum og vonandi nokkrum sjónvarpsmyndavélum á aðgerðastað. Hvað ætli þjóðinni þætti um þvílíka sýndarmennsku eins og aðstæður eru í dag ef svipað mál kæmi upp?

Óhætt að skjóta hvítabirni?

Þörf ábending og vinarbragð

Það er undarlegt að tala um að með því að senda forseta persónulegt bréf, en ekki opinbert, og benda á það sem gætu virst ágallar á viðkvæmu máli, og jafnvel að lög sem að almenningi ber að fara eftir hafi ekki verið virt af forseta, sé um aðför að ræða. Nær væri að tala um þarfa ábendingu og vinarbragð. Fram kemur einnig að Davíð virðist hafa tekið skýringar forseta gildar og ekki aðhafst frekar. Einnig er ljóst af fréttinni að málið rís ekki hjá Davíð sjálfum heldur hjá Hagstofu sem bendir Davíð á hugsanlega annmarka, ábending sem hann telur sér skylt að fylgja eftir. Það er ljóst að aðgerðaleysi og eftirlit opinberra aðila hefur kostað íslenskt þjóðfélag mikið síðustu ár og spurning hvort mönnum lærist ekki að fagna athugasemdum og svara þeim málefnalega frekar en móðgast fyrir sína hönd og annarra. Fréttin er að öðru leyti hroðvirknisleg og ónákvæm. Höfundurinn Guðjón Friðriksson heitir ekki Gunnar og Hagstofa heyrði ekki undir forsætisráðuneyti heldur var sérstakt ráðuneyti en forsætisráðherra var jafnframt Hagstofuráðherra.

Davíð sagður hafa gert aðför að forsetahjónunum

Heilagir Hollendingar

Mikið eru Hollendingar indælir að lána okkur peninga til þess að borga þeim það sem þeir kúguðu út úr okkur með fulltingi bandamanna sinna í ESB. Þetta er hvílík manngæska að mann setur hljóðan og vöknar um augu. Við munum standa í eilífri þakkarskuld við þessa vinaþjóð - þ.e. svona milljón króna á mann þakkarskuld.

Hollendingar lána Íslandi

Heilagur Steingrímur í leynimakki

Það er með ólíkindum að Steingrímur J. hafi viljað taka þátt í leynimakki. Vandlætingin skín af honum í hvert skipti ef honum finnst ekki allir hlutir vera uppi á borði eða hann fullkomlega upplýstur um þá. Jafnvel þó að ástæðan sé einfaldlega sú að hann er í stjórnarandstöðu og hefur ekki verið kosinn til að taka þær erfiðu ákvarðanir sem oft þarf að taka, né á að hafa upplýsingar um allar forsendur allra mála. Nú eru skrýtnir tímar.

Vildi leynilega sendinefnd til Noregs

Varfærinn fjárfestir

Það er vitað að viðkomandi hefur fjárfest í íslenskum fyrirtækjum frá upphafi íslensks hlutabréfamarkaðar, löngu áður en hann tók við núverandi embætti, og er varfærinn og grandvar maður. Það eina sem kemur á óvart í þessu máli er að hann hafi ekki lokað stöðu sinni mun fyrr. Væntanlega var viðkomandi meðvitaður um að það kynni að orka tvímælis og beið því með að selja lengur en honum sjálfum sem fjárfesti leið vel með. Er er hægt að ætlast til að menn setji allt sitt í hættu þótt þeir gegni opinberum embættum, eða megi ekki fjárfesta í íslensku atvinnulífi? Verða lög þá ekki að vera skýr þar um? Það má eflaust færa rök fyrir því að viðkomandi hafi tekið út og setið af sér mun meiri lækkun bréfa sinna einmitt vegna embættis síns en hann hefði gert annars.

Ráðuneytisstjóri hugsanlega innherji

Næsta skref

Næsta skref hlýtur að vera að sýna í smáu en án þess að það geti verið misskilið óánægju okkar með svokallaða Vestræna bandamenn. Bandamenn sem þykjast vera með okkur í varnarbandalagi en láta sér efnahagslegt öryggi þjóðarinnar í léttu rúmi liggja, en beita okkur ofbeldi í stað þess að vinna að lausn erfiðra mála með okkur. Við eigum að kalla heim þá Íslendinga sem starfa á vegum NATO í Afganistan, jafnvel undir breskri stjórn, á meðan við íhugum stöðu okkar. Við eigum að kalla heim sendiherra okkar hjá NATO á meðan við íhugum stöðu okkar í bandalaginu. Staða okkar þar er augljóslega ekki söm og þarfnast endurmats. Við eigum að sýna með klárum hætti að slíkt endurmat mun eiga sér stað.

Hætt við loftrýmisgæslu Breta